Psa 96 | MMX | STEP | Mina vixan toxompixan maxat ti Leeme Silok! Lavatbung menemen axap, minak pixan ti Leeme Silok!

Psalms 96

Moroa Ni Loorong Silok Ik Lok Mavana Axap

1 Mina vixan toxompixan maxat ti Leeme Silok! Lavatbung menemen axap, minak pixan ti Leeme Silok! 2 Minak pixan ti Leeme Silok, la mina emi asu min! At levenaleng axap mina vavang mi lagale lavavang do neni ga lox asepmus nedik. 3 Mina vavang asu lisisinang teren uto at laranep silok, la mina tere limixin mi mo lempanga lolos neni gak lox i.

4 Leeme Silok, neni i silok aleng; kuren la i epovo rinotno do leemi asu atdik tin naba silok aleng; loklok ngangao atnedik tin naba volo axap levenmoroa xaxarang at na lavatbung menemen. 5 Leven moroa ap mo levenabung mixin petpes, nedi levempoovo vanga mun. Ketla mo Leeme Silok, neni ga rudum li laxalibet. 6 Lisisinang mi laasen silok duk lok kangkan i; lolos eburu mi lempanga maraanu du umsu xeneng at loogu laplavang teren. 7 Limixin axap at lavatbung menemen. Mina emi asu mi Leeme Silok; mina emi asu mi lisisinang la lolos teren. 8 Leemi asu ri laasen melemelengan at Leeme Silok; mina emu eburu mi teventamtaba la mina beles de at loogu laplavang teren. 9 At loxonaleng mo laradi melemelengan na vor asuvos, mina xis tintiding to melamgo ren; lavatbung menemen axap, mina lok ngangao aleng to melamgo ren.

10 Mina paase i ri larabung mixin axap do, Leeme Silok, neni Loroong Silok!” Lavatbung menemen it kis tuxuruxun to at loxot teren la teta noxo vuk gili i. Neni naba ila mumu limixin mi lodoxoma mokmokso. 11 Lavatbung menemen eburu mi laxalibet, munak lek! Laras una luulung mi lomomo! Lempanga dik lok keneng taram, dinap kup momo. 12 Levennep kangka eburu mi levempanga dik lok keneng atnimi, minak lek! La larauna ro xeneng at laxairing, dinabap kup mi leklek, 13 at loxonaleng Leeme Silok na vot kusu rim gomgonga lavatbung menemen. Neni nabam gomgonga limixin at lavatbung menemen mi lodoxoma mokmokso la levelinga ruturun.